Бир жанг тарихи: Руслан Чагаев vs Владимир Кличко!

2009 йилнинг 20 июнь куни Германиянинг Гельзенкирхен шаҳридаги "Veltins Arena" стадионида супероғир вазн тоифасида 12 раундлик чемпионлик жанги ўтказилган. Унда IBF, WBO ва IBO йўналишлари чемпиони украиналик Владимир Кличко WBA чемпиони Руслан Чагаевга қарши рингга кўтарилганди. 

Ўша жангда ўртага фақат Владимир Кличконинг барча чемпионлик камарлари қўйилганди. Шунингдек, вакант бўлиб турган The Ring журнали камари ҳам ғолибга тақдим этиларди. Икки ҳафталик қисқа огоҳлантириш билан жангни қабул қилгани учун Чагаевнинг чемпионлик камари ўртага қўйилмаган эди. 

Иккинчи раундда Владимир Кличко жангга тайёргарликсиз чиққан чарм қўлқоп устамизни нокдаун ҳолатига тушириб қўйди. Тўққизинчи раунддан кейин эса Чагаевнинг мураббийлари жангни давом эттирмасликни лозим топишди. Жанг тўхтатилгунига қадар Кличколарнинг кичиги уччала ҳакам ҳисоб-китобига кўра ғалаба (89:81, 90:79, 88:82) қозонаётганди.

Ушбу жангни Германиянинг ўзида 11,5 миллион киши RTL телеканалида, 7,5 миллион киши Интер каналида томоша қилган. 

— 2009 йилда Владимир Кличкодан фаолиятингиздаги илк мағлубиятни қабул қилиб олдингиз. Ўшанда жангга қисқа огоҳлантириш билан чиққан эдингиз. Мағлубиятингизнинг асосий сабаби шу бўлганмиди?

— Ҳа, мен ўша жангни икки ҳафтада қабул қилдим. Аммо мен ҳеч нарсадан афсусланмайман, чунки бундай имконият ҳеч қачон насиб этмаслиги ҳам мумкин эди. Умуман олганда, мен ҳеч қандай зарарли эмаслигимни ва мен билан жанг қилиш мумкинлигини бутун дунёга кўрсатишга ёрдам бергани учун Владимирдан миннатдорман. Бўлмаса, ҳамма Валуевнинг гапига ишониб қоларди. Николай Валуевни мағлуб этганимдан кейин у мени тоза жанг ўтказмайди деб бутун дунёга жар солганди. Кличко билан жанг бўйича ҳеч қандай савол йўқ, Володя ҳақиқатан ҳам жуда зўр боксчи, у рақибларини ҳис қилади, у рингда кўп ҳаракат қилади. Эҳтимол, тўлиқ тайёргарлик кўрганимда яхшироқ чиқиш қилардим ва манзара бошқача бўларди, лекин умуман олганда, натижага шубҳа йўқ.