Рустам Тўлаганов: "Нокаут режа қилмагандик"

Ушбу жангда Тўлагановга колумбиялик Беиби Беррокал рақиблик қилди. 8 раундга мўлжалланган жанг тўлиқ давом этди. Баҳснинг асосий қисмида ҳамюртимиз устунлик қилди. Якунда ҳакамлар бир овоздан Рустам Тўлагановнинг ғалаба қозонганини қайд этишди. www.olamsport.com сайти муҳбири жангдан кейинги фикрларини билиш мақсадида, боксчимиз билан боғланди:

«Тўғри, бир йиллик танаффусдан сўнг рингга қайтиш бироз қийин бўлди. Лекин мураббийларимиз, жамоамиз билан келишганимиздек уддаладик. Нокаут режа қилмагандик, жангни тўлиқ ўтказишни мўлжаллаган эдик. Ҳамма нарса режа асосида кечди. Рақибим анчайин тажрибали боксчи. Ўзингиз ҳам жангни кўрдингиз: қанча зарба ўтказиб юборишига қарамай оёқда туришга, 8 раундни якунлашга ҳаракат қилди. Бироқ биз мақсадимизга эришдик. 

Машғулотларни бир муддат терма жамоа билан ҳам олиб бордим. Москвада ҳам тайёрландик. Кўпроқ тезлик устида ишлашга эътибор берилди. Кейинги режаларимиз келаётган жангга пухта тайёргарлик кўриш. Насиб қилса март ойида 5-жангим бўлади» - деди Тўлаганов.

Сарвиноз Рахмонқулова суҳбатлашди