Saint Louis Rapid & Blitz. Нодирбек Абдусатторов рапид баҳсларидаги иштирокини якунлади

Saint Louis Rapid & Blitz мусобақаси "Grand Chess Tour" лойиҳаси доирасидаги тўртинчи турнир бўлиб, унинг мукофот жамғармаси 175 000 АҚШ долларини ташкил қилади. Бош соврин учун биринчи рақамли шахматчимиз Нодирбек Абдусатторов ҳам кураш олиб боряпти. 

Турнир айланма форматда, рапид ва блиц йўналишларида вақт назоратида ўтказиляпти. Гроссмейстерлар 9 тур рапид, 18 тур блиц йўналишида ўзаро дона суришади. Мусобақанинг дастлабки уч куни рапид баҳслари ўтказилди. Қолган икки кун эса энди блиц турнири ташкил этилади. Рапид қисмидаги ғалабага 2, дурангга 1 очко берилди. 

Турнир иштирокчилари: Нодирбек Абдусатторов (Ўзбекистон), Левон Аронян, Фабиано Каруана, Ҳикару Накамура, Леньер Домингес, Уэсли Со (ҳаммаси АҚШ), Максим Вашье-Лаграв, Алиризо Фирузжа (иккиси Франция), Ян Непомняший (FIDE), Рамешбабу Прагнанандҳа (Ҳиндистон)

Мусобақанинг учинчи куни ҳам шахматчилар 3 та турда тўқнаш келишди. Нодирбек Абдусатторов кеча 1 ғалаба, 1 дуранг ва бир мағлубият қайд этди. Ҳамюртимиз асли арманистонлик, бир неча йилдан бери АҚШ шарафини ҳимоя қилаётган Левон Аронянни мағлубиятга учратди. FIDE байроғи остида ҳаракат қилаётган россиялик Ян Непомняший билан муросага келди. Америкалик Уэсли Сога эса имкониятни бой бериб қўйди. 

Шу тариқа, Нодирбек Абдусатторов 8 очко билан қўшимча кўрсаткичларга кўра рапид баҳсларини 9-ўринда якунлади. Ҳиндистонлик Рамешбабу Прагнанандҳа 4 очко билан сўнгги поғонадан жой олди. Ян Непомняший 11 очко билан қўшимча коэфицентларга кўра 1-ўринни эгаллади. Кучли учликни якунлаб берган франциялик гроссмейстерлар Алиреза Фирузжа ва Максим Вашье-Лаграв ҳам 11 очкодан жамғаришди.   

Бугун Saint Louis Rapid & Blitz мусобақасининг блиц баҳсларига старт берилади. Илк тур учрашувлари бизнинг вақт билан соат 23:00да бошланади.