Сауль "Канело" Альварес иккинчи бор мутлақ жаҳон чемпионлик камари учун жанг ўтказди

Бу сафарги уриниш ҳам иккинчи ўрта вазн (76,2 кг) тоифасида мутлақ жаҳон чемпионлик камари учун кечди. Мексикалик 34 ёшли чемпион фаолиятида илк бор Шимолий Америка қитъасидан ташқарида жанг ўтказди. Канелога кубалик 32 ёшли Уильям Скулл (23-1, 9 КО) рақиблик қилди. 

Ўн икки раунд тўлиқ давом этган чемпионлик жангида Канело ҳакамларнинг якдил қарори билан 115-113, 116-112, 119-109 ҳисобида ғалаба қозонди. Бу билан у WBA, WBC ва WBO чемпионлик камарларини ҳимоя қилиш баробарида Скуллга тегишли бўлиб турган IBF камарини ҳам тортиб олди ҳамда фаолиятида иккинчи бор мутлақ жаҳон чемпионига айланди. 

Эътиборга молик жиҳати шундаки, Канело қаторасига олтинчи бор тўлиқ жанг ўтказди. У сўнгги бор 2021 йилда муддатидан аввал ғалаба қозонган эди. Мексикалик афсона ҳисобида 63 ғалаба, 2 мағлубият ва 2 дуранг бор. 

Маълумот учун, Канело 2021 йилнинг ноябрида илк бор мутлақ жаҳон чемпиони бўлганди. Ўшандан кейин у тўрт бор камарларини ҳимоя қилди. Ўтган йилнинг июль ойида Сауль IBF камарини мажбурий ҳимоя қилишдан бош тортиб, нисбатан кўпроқ пул келтирадиган Эдгар Берланга билан жангни афзал билганди. Натижада Скулл вакант қолган чемпионлик камарини россиялик Владимир Шишкинни мағлуб этиб, қўлга киритганди.