Сергей Фомин ютқазмади, лекин иштирокини тўхтатди

Мукофот жамғармаси 25 000 АҚШ долларини ташкил этувчи ушбу мусобақада ҳамюртимиз Сергей Фомин ҳам ўз имкониятини синаб кўрди. Афсуски, жароҳат сабаб камбэк қила олган учрашувини давом эттира олмади. 

Мамлакатимизнинг иккинчи ракеткаси япониялик Такуя Кумасакага қарши кортга чиқди. Икки соату 21 дақиқа давом этган учрашувнинг биринчи сети 7/5 ҳисобида Кунчиқар юрт теннисчиси фойдасига ҳал бўлди. Иккинчи сетни 1/4 ҳисобида бой бераётган Фомин ўйинга қайтди ва тай-брекда мувозанатни тиклади - 7/6(6). Ҳал қилувчи учинчи сет 1/1 бўлиб турган бир пайтда Сергей жароҳат сабаб баҳси тўхтатишга мажбур бўлди.   

Таққослаш учун, Сергей Фомин ATP рейтингида 577, Такуя Кумасака эса 521-поғонадан жой олган. Япониялик теннисчи омад сабабли кейинги босқичга йўл олди.