"Шаҳрисабз Опен"нинг биринчи кунги ғолиблари маълум ФОТОРЕПОРТАЖ

Қарши шаҳридаги "Ватанпарварлар" боғида мусобақанинг очилишига бағишлаб ўтказилган тантанали маросимда Қашқадарё вилояти ҳокими Зойир Мирзаев ҳам иштирок этиб, спортчиларга муваффақият тилади ва пойгага старт берди.

Эркаклар ва ўсмирлардан иборат 70 нафардан зиёд спортчилар қарийб 110 км га яқин масофани босиб ўтиб, қадимий ва гўзал Шаҳрисабз шаҳрининг Амир Темур хиёбонига (Оқ сарой мажмуасига) етиб келишди.

Велопойга иштирокчиларини Шаҳрисабз шаҳар ҳокими Акром Сулаймонов, сектор раҳбарлари, Ёшлар агентлиги ҳамда кенг жамоатчилик вакиллари тантанали равишда кутиб олди.

Велоспортнинг шоссе йўналиши бўйича гуруҳ пойгасида белгиланган финишга биринчи бўлиб Хоразм вилояти спортчиси Умиджон Бахтиёров етиб келди. Пойтахтлик Эдем Эминов иккинчи бўлиб марра чизиғини босиб ўтди. Фахрли учинчи ўрин эса Тошкент вилояти велопойгачиси Акром Суннатовга насиб этди.

Маълумот учун, мазкур мусобақа Ўзбекистон Республикаси Туризм ва спорт вазирлиги, Қашқадарё вилоят ҳокимлиги ва Ўзбекистон велосипед спорти федерацияси ҳамда Ўзбекистон Миллий олимпия қўмитаси ҳамкорлигида ўтказилмоқда.

Бугун Шаҳрисабз шаҳрида мусобақанинг критериум гуруҳ пойгаси йўналиши бўйича ғолиб-совриндорлари аниқланади.

Фахриддин Чориев, сайтимизнинг Қашқадарё вилоятидаги мухбири