Шахматчиларимиз Жаҳон кубогининг иккинчи босқич биринчи турида қандай натижа қайд этишди?

Дунёнинг 206 нафар шахматчиси қатнашаётган нуфузли мусобақанинг 1/64 финал босқичида илк учрашувлар ўтказилди. Тўрт нафар гроссмейстеримиздан биргина Жавоҳир Синдаров ўз партиясида ғалабага эришди. У қора доналарда черногориялик Никита Петровни мағлубиятга учратиб, жавоб баҳси олдидан яхшигина имкониятга эга бўлиб олди. Бугун у оқ доналарда камида дуранг натижа қайд этса ҳам кейинги босқич йўлланмасини қўлга киритади. 

Қолган уч шахматчимиз - Нодирбек Абдусатторов, Нодирбек Якуббаев ва Шамсиддин Воҳидов илк учрашувда қора доналарда ўйнаб, рақиблари дурангга рози бўлишди. Воҳидов ўз иштирокини 1/128 финал босқичидан бошлаганди. Бу босқичда Муҳаммадзоҳид Суяров озарбайжонлик гроссмейстерга ютқазган бўлса, Шамсиддин Вохидов ғалабага эришганди. 

Гроссмейстерларимизнинг 1/64 финал илк учрашувдаги натижалари: 

Нодирбек Абдусатторов - Денис Махнев (Қозоғистон) - 0,5:0,5

Жавоҳир Синдаров - Никита Петров (Черногория) - 1:0

Нодирбек Якуббоев - Никлас Хашимбент (Германия) - 0,5:0,5

Шамсиддин Воҳидов - Максим Чигаев (Испания) - 0,5:0,5

Ўйинлар классик шахмат йўналишида иккита партиядан иборат. Икки ўйин якунига кўра зафар қучган шахматчи кейинги босқичга йўл олади. Агар кучлар тенг келиб қолса, бугуннинг ўзида шахматчилар ўртасида тай-брек ташкил этилади. Бугунги иккинчи партия учрашувлари бизнинг вақт билан соат 14:30да бошланади.