Синдаров Grand Chess Tour: Saint Louis Rapid & Blitz 2026 пешқадамлар сафида

Ушбу нуфузли турнирда ҳамюртимиз Жавоҳир Синдаров ҳам дона сурмоқда. Мусобақанинг биринчи куни рапид бўйича учта тур учрашувлари ўтказилди. Жавоҳир 1-турда оқ доналарда нидерландиялик дуранглар қироли Аниш Гири, 2-турда германиялик Винсент Кеймер билан муросага келди. Учинчи турда эса нидерланд гроссмейстери Йорден ван Форест мағлуб этилди. 

Шу тариқа, биринчи кунги баҳслардан сўнг ҳиндистонлик Рамешбабу Праггнанандҳа 2 ғалаба ва 1 дуранг эвазига 5 очко билан турнир жадвалида пешқадам бўлиб олди. Бир ғалаба ва 2 дурангга эга Жавоҳир Синдаров 4 очко билан қўшимча кўрсаткичларга кўра 2-ўринни банд этган. АҚШ вакили Уэсли Со ҳисобида ҳам 4 очко бор.    

Бугун рапид бўйича баҳслар давом эттирилади. Партиялар бизнинг вақт билан соат 22:00да бошланади. Тўртинчи турда Жавоҳир қора доналарда пешқадам Рамешбабуга қарши баҳс олиб боради. 

Маълумот учун, учрашувлар рапид ва блиц йўналишларида ташкил этилади. Рапидда вақт назорати 25+10, блицда эса 5+2 форматида бўлиб ўтади. 

Иштирокчиларнинг тўлиқ таркиби: Жавоҳир Синдаров (Ўзбекистон), Фабиано Каруано, Левон Аронян, Уэсли Со, Леньер Домингес, Авондер Лианг (барчаси АҚШ), Винсент Кеймер (Германия), Аниш Гири, Йорден ван Форест (иккиси ҳам Нидерландия), Рамешбабу Праггнанандҳа (Ҳиндистон).