Sinquefield Cup. Нодирбек Абдусатторов қатнашаётган турнирда 6-партия ўтказилди (барча маълумотлар)

Grand Chess Tour мусобақасининг бешинчи босқичи ҳисобланган ушбу турнирнинг мукофот жамғармаси 350 000 АҚШ долларини ташкил этади. Ғолиб шахматчи 100 000 долларга эга чиқади. Мусобақада дунёнинг 10 нафар кучли гроссмейстери бош соврин учун баҳс олиб бормоқда. Улар орасида жаҳон чемпиони Нодирбек Абдусатторов (2762) ҳам бор. 

Бир кунлик танаффусдан сўнг турнирда 6-тур партиялари ўйналди. Ҳамюртимиз қора доналарда аутсайдер Аниш Гири (Нидерландия, 2746)га қарши баҳс олиб борди ва дурангга имзо чекди. Бугун ўтказиладиган 7-партия олдидан Нодирбек 5 дуранг ва 1 мағлубиятга эга бўлиб турибди. У ҳамон ушбу мусобақада ғалаба қозона олмаяпти.  

Олтинчи турда ҳам аввалги турларда бўлгани сингари битта ғалаба қайд этилди. Мусобақада биринчи рақам остида таснифланган Фабиано Каруана (АҚШ, 2793) қора доналарда ўйнашига қарамай, иккинчи рақамли шахматчи Ян Непомняший (FIDE, 2767) устидан ғалабага эришди. Турнирда пешқадамлик қилаётган Алиреза Фирузжа (Франция, 2751) эса қора доналарда америкалик Уэсли Со билан муросага келди. 

Бугун турнирнинг 7-турида Нодирбек Абдусатторов оқ доналарда Уэсли Сога қарши баҳс олиб боради. Еттинчи тур олдидан ҳамюртимиз 2,5 очко билан қўшимча кўрсаткичларга кўра 9-ўринни эгаллаб турибди. Саккизинчи поғонадаги Ян ҳисобида ҳам 2,5 очко бор. Алириза 4 очко билан якка пушқадам. Кучли учликдан жой олган Каруана ва Со ҳисобида 3,5 тадан очко бор. 

Турнир иштирокчилари: Фабиано Каруана (АҚШ, 2793), Ян Непомнящий (FIDE, 2767), Доммараджу Гукеш (Ҳиндистон, 2766), Нодирбек Абдусатторов (Ўзбекистон, 2762), Уэсли Со (АҚШ, 2751), Алиреза Фирузжа (Франция, 2751), Рамешбабу Прагнанандха (Ҳиндистон, 2749), Аниш Гири (Нидерландия, 2746), Дин Лижэнь (Хитой, 2745), Максим Вашье-Лаграв (Франция, 2721).