Sinquefield Cup. Нодирбек Абдусатторовда дуранг ва бошқа натижалар

Grand Chess Tour мусобақасининг бешинчи босқичи ҳисобланган ушбу турнирнинг мукофот жамғармаси 350 000 АҚШ долларини ташкил этади. Ғолиб шахматчи 100 000 долларга эга чиқади. Мусобақада дунёнинг 10 нафар кучли гроссмейстерлари бош соврин учун баҳсларга киришди. Улар орасида жаҳон чемпиони Нодирбек Абдусатторов (2762) ҳам бор. 

Турнирнинг 4-турида ҳамюртимиз қора доналарда Максим Вашье Лаграв (Франция, 2721)га қарши баҳс олиб борди ва дурангга имзо чекди. Тўртинчи турда битта ғалаба қайд этилди. Америкалик Уэсли Со оқ доналарда ўйнаб, FIDE байроғи остида ҳаракат қилаётган Ян Непомняшийни таслим этди. Мусобақанинг биринчи рақамли иштирокчиси, жаҳон рейтингида 3-ўринда бораётган Фабиано Каруана (АҚШ, 2793) қора доналарда хитойлик Дин Лижэнь билан муросага келди. Турнир жадвалида пешқадамлик қилаётган Алиреза Фирузжа (Франция, 2751) қора доналарда ҳиндистонлик Гукеш билан дуранг қайд этди. 

Турнир иштирокчилари: Фабиано Каруана (АҚШ, 2793), Ян Непомнящий (FIDE, 2767), Доммараджу Гукеш (Ҳиндистон, 2766), Нодирбек Абдусатторов  (Ўзбекистон, 2762), Уэсли Со (АҚШ, 2751), Алиреза Фирузжа (Франция, 2751), Рамешбабу Прагнанандха (Ҳиндистон, 2749), Аниш Гири (Нидерландия, 2746), Дин Лижэнь (Хитой, 2745), Максим Вашье-Лаграв (Франция, 2721).

Бугун Нодирбек 5-турда оқ доналарда турнирнинг учинчи тартиб рақамли шахматчиси Доммараджу Гукеш (Ҳиндистон, 2766) билан муносабатларига ойдинлик киритиб олади. Тўртинчи турдан сўнг турнир жадвалида қўшҳокимлик юзага келган. Алиреза Фирузжа ва Уэсли Со 2,5 очкодан жамғариб, пешқадамлик қилишяпти. Олти нафар гроссмейстер 2 очкодан жамғарган. Бир ярим очкога эга бўлиб турган Нодирбек Абдусатторов ва нидерландиялик Аниш Гири сўнгги поғоналардан жой олишган.