Сирил Ган спарринг жараёнида Франсис Нганнуни нокаутга учратгани маълум бўлди

Маълумот учун, интернетда собиқ спарринг шериклар Франсис Нганну ва Сирил Ган ўртасидаги спарринг видеолари тарқалди. Унда Сирил Ган Франсис Нганнуга умуман имконият қолдирмаганини кўриш мумкин. Ганнинг мураббийи бу тасвирлар ҳали ҳаммаси эмаслиги, Сирил спарринг охирида Нганнуни нокаутга учратганини ҳам гапирди.

"Биринчидан, бу видеодан катта муаммо ясаш шарт эмас. Ҳозирги Нганну жангга қандай ҳолатда чиқишини биз яхши биламиз. Франсис бу видеони манипуляция деб атади. Агар биз ростан ҳам видеони секинлаштирганимизда, унда Нганнунинг ҳаракатлари билан биргаликда Сирил ҳам секин ҳаракат қилиши керак бўларди. Амалда эса Сирил Ган қанчалик тез ҳаракат қилаётгани аниқ кўринади. Аслида, бу спаррингда икки жангчи ҳам яхши ҳаракат қилганди.

Шу сабаб ҳам, биз Нганнуни обрўсизлантиришга уринмадик. Агар ниятимиз шундай бўлганда, биз спаррингнинг охирги қисмини кўрсатган бўлардик. Ўшанда Нганну кучли зарба ўтказиб юбориб, ўтириб қолганди ва спаррингни якунлашга мажбур бўлганди. Менда ҳамма видеолар бор. Лекин, биз буни эълон қилмаймиз. Агар сиз машғулотларда кимнидир нокаутга учратсангиз, бу сиз ҳақиқий жангда ҳам ўша жангчини мағлуб қилишингизни кафолатламайди. Қисқа қилиб айтганди, Сирил тиззаси билан Нгауннинг танасига берилган зарба оқибатида Франсис нокаутга учраганди. Агар Нганну ўшанда мен ростдан Сирил Гандан кучлироқ эдим деса, биз ўша тасвирларни интернетга жойлашимиз мумкин", -дейди Сирил Ганнинг мураббийи Фернанд Лопес.