Соҳибжамол Осиё чемпионати совриндори! Жалолов финалда, Жамаловда кутилмаган мағлубият

Қирғиз Республикаси пойтахти Бишкек шаҳри мезбонлик қилаётган спорт курашлари бўйича катталар ўртасидаги Осиё чемпионатининг навбатдаги куни эркин курашчилар баҳсларга киришишди. Аёллар кураши беллашувларида эса биргина вакиламиз шоҳсупага кўтарилди. -53 кг вазн тоифасида юртимиз шарафини ҳимоя қилган Соҳибжамол Эсбосинова учинчи ўрин учун кечган беллашувда жанубий кореялик рақибаси Парк Се Йонгни мағлуб этиб, бронза медалига сазовор бўлди.  

Эркин кураш баҳсларида Умиджон Жалолов саралаш баҳсларини муваффақиятли ўтказиб, финалга етиб келди. Бугун у Осиё чемпионлиги учун азалий рақиби ҳиндистонлик Сужитга қарши гиламга чиқади ва аввалги мағлубият учун реванш олиш имконига эга бўлади. 

Афсуски, Париж-2024 Олимпиадаси чемпиони Разамбек Жамалов ўзи учун янги вазнда (-79 кг) олтин ёки кумуш медални қўлга кирита олмайди. У 1/2 финалда япониялик унча таниқли бўлмаган Кейван Гареҳдагига бир очко фарқи (3-4) билан ютқазиб қўйди. Бугун Разамбек Осиё чемпионатининг бронза медали учун мўғулистонлик Сулдҳу Олонбаярга қарши гиламга чиқади. 

Шунингдек, эркин курашчиларимиздан Шаҳзодбек Ярашев ва Шерзод Поёнов ҳам бронза медали учун кечадиган беллашувларда ўз маҳоратини намойиш этади.    

Финал:

-65 кг: Умиджон Жалолов — Сужит (Ҳиндистон)

Бронза медали учун:

-70 кг: Шаҳзодбек Ярашев — Сина Ҳалили (Эрон)

-79 кг: Разамбек Жамалов — Сулдху Олонбаяр (Мўғулистон)

-97 кг: Шерзод Поёнов — Вики (Ҳиндистон)