Спорт соҳаси мутасаддилари ташаббус кўрсатишяпти + ФОТО

2020 йил 14 апрель куни Ўзбекистон Республикаси Президенти Шавкат Мирзиёев раислигида бўлиб ўтган глобал инқироз ва пандемия шароитида қишлоқ хўжалиги бўйича долзарб вазифаларга бағишланган видеоселектор йиғилиши бўлиб ўтган эди. 

Мазкур йиғилишда берилган кўрсатма ва топшириқлар ижросини таъминлаш мақсадида Қашқадарё вилоят жисмоний тарбия ва спорт бошқармаси бошлиғи Сирожиддин Одилов ташаббуси билан Касби туманидаги маҳаллалар аҳолисининг ўз томорқаларидан унумли фойдаланишни ташкил этиш ва қишлоқ хўжалиги махсулотларини  етиштириш юзасидан тушунтириш ишлари олиб борилди. 

Шунингдек, вилоят жисмоний тарбия ва спорт бошқармаси, Касби туман жисмоний тарбия ва спорт бўлими, туман болалар-ўсмирлар спорт мактаби ходимлари, мураббийлари тумандаги ёрдамга муҳтож ва кам таъминланган оилалар холидан хабар олишиб, уларга тегишли бўлган томорқаларга ишлов беришиб, полиз ва сабзоват кўчатларини экиб беришди. 

Спорт соҳасида самарали меҳнат қилган ва айни пайтда 1-гуруҳ ногиронлари саналган Латиф Саломов, Эркин Жўраев, бетоблиги боис шифохонада даволанаётган Раҳматилло Маъдиев, боқувчисини йўқотган Дилноза Сулаймоноваларнинг ҳам хонадонларида бўлишиб, ёрдам сифатида озиқ-овқат маҳсулотлари улашишди ва уларнинг ҳам томорқаларидаги бўш турган ерларга ишлов беришиб, турли хил кўчатлар экиб беришди. 

Бундай хайрли ташаббуслар жисмоний тарбия ва спорт бошқармаси ташаббуси билан вилоятнинг барча туман ва шаҳарларида давом этмоқда.

Илҳом РАҲМОНОВ тайёрлади