Спортни ривожлантириш вазири ўзбек боксида иш бошлаган кубалик мутахассис билан учрашди

Учрашув давомида спортнинг бокс тури бўйича Куба тажрибасидан фойдаланган ҳолда маҳаллий спортчилар маҳоратини ошириш, спорт мураббийларининг тажрибасини такомиллаштириш масалалари муҳокама қилинди. Хусусан халқаро мураббий томонидан Республикада фаолият юритаётган бокс мактабларини ўрганиш, машғулотларда иштирок этиш истаги борлигини маълум қилди.

Шу ўринда Куба бокси ҳақида. Куба бокси ҳаваскор бокс оламида етакчилардан бири ҳисобланади. Ўн тўртта Олимпиада ўйинларида кубалик боксчилар 41 та медални қўлга киритишган бўлиб, шундан: олтин — 23 та; кумуш — 13 та; бронза – 5 тани ташкил қилади. Бу Олимпиаданинг юз йиллик тарихида медаль соҳиблари ва Олимпия ўйинлари совриндорларига эга бўлган 61 давлат орасида бешинчи кўрсаткичдир. Олтин медаллар сони бўйича кубалик боксчилар дунёда иккинчи ўринни эгаллашган.

Шунингдек, учрашув давомида, вилоятлардаги спорт мактабларида спортнинг бокс тури билан шуғулланиб келаётган спортчиларнинг ҳам жисмонан, ҳам руҳан тайёргарликларини оширишда хорижий тажриба муҳим аҳамият касб этиши таъкидланди. Халқаро даражадаги мураббий, профессор Карлос Иван Фуэнтос Вилануева яқин кунларда Қашқадарё вилоятига бориши ва спорт мактабларини кўздан кечиришни режалаштирганини маълум қилди.