Superbet Poland Rapid & Blitz. Нодирбек Абдусатторов пешқадамлар сафида + ФОТО

Мукофот жамғармаси 175 000 АҚШ долларини ташкил этувчи ушбу мусобақада дунёнинг кучли 10 нафар гроссмейстери бош соврин учун баҳсларга киришди.

Қувонарлиси, улар орасида дунё рейтингида 5-ўринни эгаллаб турган ҳамюртимиз Нодирбек Абдусатторов ҳам бор. Кеча турнирнинг илк куни шахматчилар учта партияда ўзаро дона суришди. 

Маълумот учун, рапид йўналишидаги баҳсларда ғалабага 2, дурангга 1 очко берилади. Блицда эса ғалабага 1, дурангга 0,5 очко тақдим этилади. Турнир ғолиби 40 000 долларга эга бўлади.   

Иштирокчилар: Магнус Карлсен (Норвегия, рапид 2828/блиц 2886), Вэй И (Хитой, 2758/2684), Ян-Кшиштоф Дуда (Польша, 2748/2766), Нодирбек Абдусатторов (Ўзбекистон, 2733/2661), Рамешбабу Прагнанандҳа (Ҳиндистон, 2704/2675), Аниш Гири (Нидерландия, 2687/2715), Аржун Эригайси (Ҳиндистон, 2671/2744), Доммараджу Гукеш (Ҳиндистон, 2649/2651), Винсент Каймер (Германия, 2647/2610), Кирилл Шевченко (Руминия, 2622/2546).

Биринчи партияда Нодирбек Абдусатторов нидерландиялик Аниш Гирини мағлубиятга учратди. Иккинчи турда Доммараджу Гукешдан устун келди. Учинчи партияда эса қора доналарда ҳаракат қилиб, Рамешбабу Прагнанандхага имкониятни бой бериб қўйди. 

Турнир жадвалида бироз кутилмаганда руминиялик Кирилл Шевченко 6 очко билан пешқадамлик қиляпти. Магнус Карлсен ва Нодирбек Абдусатторов 4 очкодан жамғариб, кучли учликка якун ясашган.