Тариқ Салмон: "Биз Эрон ва Ўзбекистонни мағлуб этган ягона жамоамиз. Рақиблар эса мундиал йўлланмасини нишонлашмоқда"

"Эрон билан ўйин биз учун қийин ва муҳим эди, айниқса янги мураббий қўл остида аҳамиятга эга эди. Энди бизнинг мақсадимиз ўзгарди. Биз тўғридан-тўғри саралаш босқичидан ўтмоқчи эдик. Аммо плей-оффга чиқдик ва бизда иккинчи имконият бор. Иншааллоҳ, уни қўлдан бой бермаймиз.

Ўзбекистонга қарши ўйин, шубҳасиз, қийин ўтади. Ўзбекистон терма жамоаси илк бор жаҳон чемпионатига йўлланма олди. Улар ҳамон муваффақиятни байрам қилишмоқда ва, албатта, мағлубиятни хоҳламасликлари аниқ.

Худди шу ҳолат бизга ҳам тааллуқли, чунки биз бу гуруҳда Эронни енгган ягона жамоамиз. Бу биз учун катта ютуқ. Ўзбекистонга нисбатан ҳам шундай таърифни ишлатишимиз мумкин. Биз Ўзбекистонни мағлуб этган ягона жамоамиз. Бундай натижалар бизнинг кучли ва ҳурматга сазовор жамоа эканлигимизни кўрсатади.

Иншааллоҳ, биз бўлажак ўйинга тайёрмиз. Муҳим учрашув олдидан жуда ҳаяжондамиз. Мураббий, албатта, мағлубиятимизни истамайди. Биз бу ўйинга шаймиз ва мухлисларни хурсанд қиламиз", деди 27 ёшли футболчи.

Эслатиб ўтамиз, жаҳон чемпионати 3-саралаш босқичи 10-туридан ўрин олган Ўзбекистон – Қатар учрашуви 10 июнь куни Тошкентдаги "Бунёдкор" стадионида ўтказилади. Ўзбекистон мундиал йўлланмасини муддатидан илгари ҳал қилган бўлса, Қатар плей-офф босқичида кураш олиб боради.