Tashkent Grand Slam 2026. Шукуржоннинг олтини ва Достоннинг бронзаси эвазига умумжамоа ҳисобида нечанчи ўриндамиз? (+ФОТО)

Аёллар ўртасидаги баҳсларда юртимиз шарафини ҳимоя қилган дзюдочимиз Шукуржон Аминова номдор рақибаларини мағлубиятга учратиб, мусобақа чемпионига айланди. -57 кг вазн тоифасидаги вакиламиз 1/2 финалда грузиялик амалдаги жаҳон чемпионини, финалда эса япониялик кучли рақибасини таслим эта олди. Ушбу ғалаба унга жаҳон рейтинги учун қимматли 1000 очкони ҳам тақдим этди. Аминова фаолиятида илк бор "Катта Дубулға" турнирида шоҳсупага кўтарилди. 

Ўзбекистон спорт делегациясига иккинчи медални Достон Рўзиев келтирди. -60 кг вазндаги дзюдочимиз бронза медали учун кечган беллашувда грузиялик Лука Гаделияни бир дақиқада иппон баҳоси эвазига енгишга муваффақ бўлди. 

Шу тариқа, Ўзбекистон терма жамоаси мусобақанинг биринчи кунги баҳслари натижаларига кўра, 1 та олтин ва 1 та бронза медали билан 39 давлат орасида фахрли 3-ўринни эгаллаб турибди. Япония терма жамоаси 2 та олтин, 3 та кумуш, 2 та бронза медали билан пешқадамлик қилаётган бўлса, 1 та олтин ва 1 та кумуш медалига эга Озарбайжон иккинчи поғонани банд этган.