Tata Steel Chess 2026. Аржунни мағлуб этган Cиндаров пешқадам Абдусатторовга етиб олди + ФОТО

Турнирнинг кучлилар жам бўлган "Мастерс" гуруҳида дунёнинг етакчи 14 гроссмейстери қаторида ҳамюртларимиз Нодирбек Абдусатторов ва Жавоҳир Синдаров ҳам бош соврин учун баҳс олиб боряпти ва эътиборлиси, кеча ўтказилган 11-турдан сўнг икки шахматчимиз 7 тадан очко жамғариб, турнир жадвалида қўшҳоким бўлиб олишди. Қўшимча кўрсаткичларга кўра Жавоҳир 1-ўринни банд этган, Нодирбек эса 2-ўринда.   

Кечаги тургача пешқадам бўлиб келган Абдусатторов қора доналарда нидерландиялик Йорден ван Форест билан муросага келди. Синдаров эса қора доналарда ўйнаганига қарамай, Ҳиндистоннинг биринчи рақамли шахматчиси Аржун Эргаисини мағлуб этишга муваффақ бўлди. 

Мусобақанинг амалдаги чемпиони ҳиндистонлик Рамешбабу Прагганандҳа оқ доналарда ҳаракат қилиб, германиялик Винсент Кеймерга имкониятни бой бериб қўйди. Словениялик Владимир Федосеев яна бир олмон шахматчиси Маттиас Блубаум билан дуранг ўйнади. Туркиялик 14 ёшли гроссмейстер Ягиз Каан Эрдогмуш мезбонлар вакили Аниш Гирига ютқазди. Амалдаги жаҳон чемпиони Гукеш Доммараджу ҳинд дербисида Аравиндҳ Читамбарам билан муросага келди. 

Ўн биринчи турдан сўнг Жавоҳир Синдаров ва Нодирбек Абдусатторов 7 тадан очко жамариб, биринчи ва иккинчи ўринларни банд этишган. Йорден ван Форест, Маттиас Блубаум ва америкалик Ҳанс Ниеманн ҳисобида 6,5 очкодан бор. Винсент Кеймер 6 очко билан 6-ўриндан жой олган.  

Tata Steel Chess 2026. 11-тур натижалари:

Рамешбабу Прагнанандҳа (Ҳиндистон) — Винсент Кеймер (Германия) 0-1 

Тай Даи Ван Нгуэн (Чехия) — Ҳанс Ниеманн (АҚШ) 0-1

Владимир Федосеев (Словения) — Маттиас Блубаум (Германия) 0,5-0,5 

Йорден ван Форест (Нидерландия) — Нодирбек Абдусатторов (Ўзбекистон) 0,5-0,5

Аржун Эригаиси (Ҳиндистон) — Жавоҳир Синдаров (Ўзбекистон) 0-1

Аниш Гири (Нидерландия) — Ягиз Каан Эрдогмуш (Туркия) 1-0 

Гукеш Доммаражу (Ҳиндистон) — Аравиндҳ Читамбарам (Ҳиндистон) 0,5-0,5

Бугун турнирда 12-турда Нодирбек Абдусатторов оқ доналарда мусобақа кашфиётларидан бири германиялик Маттиас Блубаумга қарши баҳс олиб боради. Жавоҳир Синдаров ҳам оқ доналарда ўйнайди. У ҳиндистонлик Рамешбабу Праггнанандҳа билан ҳисоб-китоб қилади. Учрашувлар бизнинг вақт билан соат 18:00да бошланади.