Тайсон Фьюри ва Фрэнсис Нганну рингда ўзаро жанг юзасидан келишиб олишди

Жанг якунланганидан сўнг Тайсон Фьюри оғир вазнда амалдаги UFC чемпиони Фрэнсис Нганнуни рингга чорлади. Аввалроқ, бу икки жангчининг бокс қоидалари асосида ўзаро рингда тўқнаш келишлари ҳақида хабарлар тарқаганди.  

"Барчасига якун ясашдан аввал рингга Фрэнсис Нганнуни чақирмоқчиман. Мен боксда оғир вазн чемпиониман, у эса бу вазнда UFC қироли. Нганну яхши спорт формасида, қаранг унинг мускулларини. Ўзаро жангимиз спортимиз тарихи учун янгилик бўлади. Иккимиз ҳам 120 кг вазндан оғирмиз. Бу эса жангнинг даҳшатли бўлишини таъминлаб беради", - деди "Лўлилар Қироли". 

Фьюрининг таклифи билан рингга кўтарилган Фрэнсис Нганну ҳам британияликка қарши жанг ўтказиш учун тайёр эканини маълум қилди.

"Сайёрамизнинг энг хавфли аҳмоғи ким эканини аниқлаб оламиз. Яна бир-икки ойдан сўнг жароҳатимдан фориғ бўламан. Бу гибридлар жанги бўлади", - дея қўшимча қилди Нганну.  

"Ваҳший"нинг UFC билан шартномаси шу йил якунига етади ва у ташкилот олдидаги мажбуриятлардан ҳоли бўлади.  

"Жангимиз 2023 йилда бўлиб ўтади", - деди Фьюри.