TePe Sigeman 2026. Абдусатторов пешқадамигини сақлаб қолди. Бугун у Магнус Карлсенга қарши ўйнайди

Мусобақада саккиз гроссмейстер бош соврин учун баҳс олиб бормоқда. Улар орасида Нодирбек Абдусатторов ҳамда жаҳон рейтинги етакчиси норвегиялик Магнус Карлсен ҳам бор. Мусобақанинг биринчи турида Абдусатторов қора доналарда ўйнаганига қарамай, турнирнинг ягона аёл иштирокчиси, хитойлик гроссмейстер Чжу Цзинерни мағлубиятга учратганди. 

Афсуски, 2-турда Нодирбек Абдусатторов оқ доналарда ҳаракат қилганига қарамай, америкалик Энди Вудвард билан дуранг ўйнади. Ваҳоланки, Нодирбек жуда катта устунликка эга бўла туриб, бундан фойдалана олмади. Магнус Карлсен эса ҳамюртимизнинг очко йўқотишидан унумли фойдаланиб қолди. У қора доналарда ўйнаганига қарамай, швециялик Нилс Гранделиусни таслим этди. 

Иккинчи турнинг қолган партияларида дуранг натижа қайд этилди. Иккинчи турдан сўнг Нодирбек Абдусатторов қўшимча кўрсаткичларга кўра ҳамон пешқадам бўлиб турибди. Аммо Энди Вудвард ва Магнус Карлсен ҳам очколарини 1,5 тага етказиб, Нодирбекка етиб олишди. 

TePe Sigeman 2026. 2-тур натижалари: 

Ягиз Каан Эрдоғмуш (Туркия) — Аржун Эргаиси (Ҳиндистон) - 0,5:0,5

Нилс Гранделиус (Швеция) — Магнус Карлсен (Норвегия) - 0:1

Нодирбек Абдусатторов (Ўзбекистон) — Энди Вудвард (АҚШ) - 0,5:0,5

Йорден ван Форест (Нидерландия) — Чжу Цзинер (Хитой) - 0,5:0,5

Бугун 3-турда Нодирбек Абдусатторов қора доналарда Магнус Карлсенга қарши баҳс олиб боради. Учинчи тур учрашувлари бизнинг вақт билан соат 18:00да бошланади. 

Эътиборга молик жиҳати шундаки, TePe Sigeman турнирининг сўнгги икки ғолиби ўзбекистонлик шахматчилар ҳисобланади. 2024 йил Нодирбек Абдусатторов, ўтган йили эса Жавоҳир Синдаров чемпионлик шоҳсупасига кўтарилган эди.