14 апр 11:22
Янгиликлар

Теннис

Тимофеева Руан турнири илк даврасида учрашув ўтказди

Франциянинг Руан шаҳрида теннис бўйича WTA 250 тоифасига кирувчи, мукофот жамғармаси 283,347 долларни ташкил этган турнирнинг асосий тўр баҳслари старт олди.

Гарчи мусобақанинг саралаш турнири финал учрашувида мағлубиятга учраган бўлса-да, Мария Тимофеева омадсиз мағлуб (LL) сифатида асосий тўрга йўлланма олганди. Ташкилотчилар асосий тўрдаги франциялик теннисчи Элза Жакмонинг ўрнини айнан Мария ҳисобига тўлдиришганди.

Афсуски, Тимофеева бу имкониятдан унумли фойдалана олмади. Мамлакатимизнинг учинчи ракеткаси 1/16 финалда британиялик Кэти Бултерга қарши кортга чиқди ва деярли қаршиликсиз 2/6, 2/6 ҳисобида имкониятни бой бериб, мусобақадаги иштирокини якунлади.

Таққослаш учун, Тимофеева WTA рейтингида 153, Бултер 62-ўринни эгаллаб турибди. Бу теннисчиларнинг ўзаро ўтказган илк учрашуви бўлади.