Тони Фергюсон бирлаштирувчи чемпионлик жанги ўтказади

Фергюсон шу йилнинг декабрь ойида Дубайда бўлиб ўтадиган мусобақада рингга қайтишга тайёргарлик кўрмоқда. 41 ёшли америкаликнинг рақиби ҳозирча расман эълон қилинмаган, аммо у катта эҳтимол билан дивизионнинг амалдаги чемпиони Али Ал-Фахри бўлиши мумкин. Бу ҳақда Лига промоутери Мемс Тейлор Ариэль Хелванига берган интервьюсида маълум қилган. Фахри ижтимоий тармоқда "AnEsonGib" номи билан танилган.

"Мен ҳозирча унинг рақибини эълон қилмайман, аммо Тони 20 декабрь куни қайтади ва камарларни бирлаштиради. Уни яна кўриш жуда яхши бўлади. Тўғрисини айтсам, Тонини ҳурмат қиламан - у жуда камтар, ажойиб йигит. Унинг яна жанг ўтказишидан хурсандман. Унинг мухлислари аввалига бизни "Solt Papi"га қарши жангимиз учун ёмон кўришди. Лекин ҳозир вазият ўзгарган. Мен унинг машқ қилаётганини кўрдим ва у билан ҳаммаси жойида, ҳавотир олманг, деб айтдим. Дарҳақиқат, у ажойиб жанг кўрсатди ва ўйлайманки, шундай давом этади", - деди промоутер.

Тэйлорнинг таъкидлашича, Ал-Фахри билан жанг бўйича ҳозирча келишув йўқ ва агар блогер жангдан бош тортса, у амалдаги камаридан маҳрум бўлади. Фергюсон эса тўлақонли чемпион сифатида рингга кўтарилади.

"Solt Papi" устидан қозонилган ғалаба "Эл-Кукуя" учун профессионал боксдаги биринчиси бўлганди. Унгача Тони UFC’да кетма-кет саккизта жангда мағлубият аламини тотиб кўрган эди.