12 окт 08:49
Янгиликлар

Теннис

Тошкент “Челленжер”. Истомин 2 190 доллар ишлаб олди

Пойтахтимизда ўтказилаётган теннис бўйича “Челленжер” туркумига кирувчи турнир ўзининг ҳал қилувчи палласига кирди.

Соврин жамғармаси 75 000 АҚШ долларини ташкил қилувчи ушбу турнирда бугун ярим финал учрашувлари ўтказилади. Афсуски, мамлакатимизнинг биринчи ракеткаси, турнирда иккинчи рақам остида ҳаракат қилган Денис Истомин кеча ярим финал чиптаси учун кечган баҳсда канадалик Феликс Алиассим Ожьега 6:7(4), 3:6 ҳисобида имкониятни бой берганди.

Тошкент “Челенжер” турнирининг чорак финалида мағлубиятга учраган Истомин 15 рейтинг очкоси ҳамда 2 190 АҚШ доллари миқдоридаги мукофот пулини қўлга киритди. Дениснинг ўтган йили ушбу турнирда ярим финалга қадар етиб келиб, бўлажак чемпион испаниялик Гильермо Гарсия Лопесга ютқазганди. Демак, душанба куни эълон қилинадиган рейтингда Истомин ҳозирги ўрнини пасайтириб олади. Айни пайтда у 87-ўринни банд этган.