Турсуной Раҳимова Ўзбекистон аёллар терма жамоаси сардори этиб сайланди

Хабарингиз бор, бир неча кундан сўнг Туркиянинг Истанбул шаҳрида бокс бўйича аёллар ўртасидаги жаҳон чемпионати бошланади.

Терма жамоамиз аъзолари машғулотларнинг сўнгги босқичини деярли ўз якунига етказишди. Қизларимиз 6 май куни Истанбулга йўл олишади. Шу муносабат билан бугун Ўзбекистон бокс федерацияси раҳбарияти терма жамоамиз вакиллари билан учрашди. Учрашувда Ўзбекистон бокс федерацияси раисининг биринчи ўринбосари Сакен Полатов ҳам иштирок этди ва боксчиларимизга омад тилади. 

Йиғилиш давомида аёллар терма жамоасига сардор тайинланди. Унга кўра, терма жамоа аъзолари бир овоздан тажрибали Турсуной Раҳимовани сардор этиб сайлашди. Олимпия ўйинлари иштирокчиси бўлган Турсуной билдирилган ишончга жавобан, жамоадошларини ўз ортидан эргаштира олиши, ЖЧдан медаль билан қайтиши ҳақида гапирди.

"Бўлажак жаҳон чемпионатида 10 та вазн тоифасида иштирок этамиз. Аввал ҳам айтиб ўтганимиздек, жисмоний ва руҳий тайёргарликка катта эътибор қаратилган. ЖЧга тайёргарлик кўришимиз учун барча шароитлар яратиб берилди. Бундан мамнунмиз.

Ҳозирда ҳолатимиз яхши деб ҳисоблайман. Кеча ўтказилган йиғилишда Ўзбекистон аёллар терма жамоаси сардори этиб сайландим. Бу менга қўшимча масъулият юклайди. Терма жамоа сардори сифатида шуни айта оламанки, Худо хоҳласа жаҳон чемпионатида ўзимизга билдирилган ишончни оқлаб, Ўзбекистонга тарихий натижа билан қайтамиз", - деди Турсуной Раҳимова.

Ўзбекистон бокс федерацияси матбуот хизмати