Уч йилдан сўнг Ўзбекистоннинг биринчи ракеткаси ўзгарди

Янгиланган рейтингдан ўрин олган 8 теннисчимиздан бор йўғи икки нафари кўтарилишга муваффақ бўлди. Энг катта янгилик - бу Сергей Фоминнинг уч йиллик танаффусдан сўнг яна Ўзбекистоннинг биринчи ракеткаси бўлиб олганидир. У Баҳрайн М25 тоифасига кирувчи турниридаги чемпионлиги ортидан рейтингда 47 поғонаган юқорилаб, Ҳумоюн Султоновни қувиб ўтди. 

Ўз ҳисобига 23 очко қўшиб олган Сергей Фомин ATP рейтингида 358-ўринга кўтарилиб олди. Бу эса уни Ўзбекистоннинг биринчи ракеткасига айлантирди. Рейтингда 16 очко йўқотиши ортидан 46 поғона пастлаган Ҳумоюн Султонов энди мамлакатимизнинг иккинчи ракеткаси мақомида бўлади. У ATP рейтингида 442-ўринга тушиб қолди.    

Учинчи ракеткамиз Максим Шин 11 поғонага юқорилаб, 966-ўринга жойлашди. Қолган барча теннисчиларимиз янгиланган рейтингда пастлашди. Амир Милушев 7, Батир Сапаев, Илья Игнатов, Абдулазиз Усмонжонов ва Дамир Абдусаломов бир хилда - 10 поғонадан пастлашди.