UFC Fight Night 274 бонуслари кимларга насиб этди?

Бу сафар промоушен раҳбарларига бонус эгаларини аниқлаш ҳам осон, ҳам қийин бўлди. Иккитагина финиш ва шу билан бирга тенг жанглар. Маркус Альмейдани ажойиб тарзда нокаутга учратган оғир вазн тоифасидаги Райан Спенн кафолатланган гонорардан ташқари қўшимча 100 000 долларлик чек олди.

Иккинчи бонус ўрта вазн тоифасидаги Жексон Маквейга насиб этди. У тадбирнинг дастлабки кардида Седрик Дюмани бўғиш усули эвазига мағлубиятга учратди. Турнирнинг энг яхши жанги сифатида ўта енгил вазн дивизиони вакиллари Дэйви Грант ва Адриан Луна Мартинеттига насиб этди. Уч раундлик жангда умумий ҳисобда 261 та аниқ зарба йўлланди. 

Бу сафар 25 000 долларлик бонуслар тақдим этилмади. Одатда бу бонус ўз жангларини муддатидан аввал якунлаган аралаш яккакураш усталарига берилар эди.