UFC жангчиси ўзи иштирокидаги жангни сотганликда гумонланиб промоушендан ҳайдалди

Ярим енгил вазн тоифасида ўтган жангда кубалик Ядиер Дель Валле америкалик Айзек Дулгарианни муддатидан олдин мағлуб этганди. Ядиер биринчи раунднинг тўртинчи дақиқасидаёқ Долгарианни ортдан бўғиш усули билан мағлубиятга учратди. 

Айзекнинг шубҳали жанги танқидларга учради. Хусусан, шоу студиясида шарҳ берган Майкл Кьеза жангчининг даражасини ҳаваскор деб атади. Америкалик жанггача сезиларли фаворит ҳисобланган, аммо айнан жанг олдидан унинг биринчи раундда муддатидан олдин мағлуб бўлишига тикилган пуллар кўпайиб кетган. Бу унинг ғалаба қозониш имкониятини 73 фоиздан 61 фоизга кескин пасайтирганди. 

Шу билан бирга, баъзи букмекерлик идоралари ҳатто "шубҳали фаоллик" баҳонасида одамларга пулларини қайтариб берди. Кеча эса Дулгариан жангни топширганликда гумон қилиниб, дунёнинг энг кучли лигасидан ҳайдалди. Ҳозирча UFC жанг сотилганлик бўйича расмий тасдиқ берганича йўқ.