UFC шон-шуҳрат зали аъзоси: "Махачев енгилмас кўринмоқда"

Ушбу вазндаги даъвогарларнинг ҳеч бири Исламнинг чемпионлигига таҳдид солмайди, деб ҳисобламоқда дунёнинг энг кучли лигаси шарҳловчиси Майкл Биспинг.

"Ўрта вазн бошқа дивизионлардан келганлар ҳисобига кўпроқ тўлдирилган бўлса ҳам, яқин келажакда кимдир Ислам Махачевни мағлуб эта олади, деб ўйламайман. Мен кейинги йигирма дақиқа давомида ярим ўрта дивизион ҳақида ва Исламга қарши ким курашиши кераклиги ҳақида гапиришим мумкин. Ҳа, мағлубиятга учрамаган Майкл Моралес ва бошқа ажойиб даъвогарлар бор, лекин мен Махачевнинг чемпион бўлиб қолишига ишонаман. У енгилмас кўринмоқда", - деди UFC шон-шуҳрат зали аъзоси ўз подкастининг навбатдаги сонида.

Ўтган йилнинг ноябрь ойида австралиялик Жек Делла Маддаленадан чемпионлик камарини тортиб олган Ислам Махачев Рамазон ойидан кейинги илк ҳимоя жангини баҳор ойлари ёки июнда ўтказишни режалаштирмоқда.