UFC`га ўтган нидерландиялик "Рицар"га дебют жанг берилди

Нидерландиялик "Рицар" UFC билан узоқ муддатли шартнома имзолади. Унинг дебют жанги 9 ноябрь куни АҚШнинг Лас-Вегас шаҳрида ташкил этиладиган UFC Fight Night 247 турнири доирасида америкалик Жеральд Мершартга қарши ўтказилади.

Маълумот учун, 34 ёшли Ренье де Риддер Осиё лигасида 7 та жангда ғалаба қозонган. Аммо кейинчалик россиялик Анатолий Малихинга қарши жанг ўтказиб, ҳар икки камарини бой бериб қўйганди. Малихин Риддерни техник нокаутга учратган эди. Шу йилнинг июль ойида у Абу-Дабида ўтган UAE Warriors 51 турнирида октагонга муваффақиятли тарзда қайтиб, биринчи раундда Магомедмурад Хасаевни техник нокаут эвазига мағлуб этганди.

Америкалик 36 ёшли Жеральд Мершарт эса муддатидан олдин қозонилган иккита ғалабали серия билан келмоқда. У Брайан Барберена ва Эдмен Шахбазянни таслим этган. Ҳозирда Жеральд ўрта вазн тоифаси рейтингининг Топ-15 талигига кирмаган. Жеральд ўз вақтида ҳамюртимиз Маҳмуд Мурадовни мағлубиятга учратган эди.