11 июл 12:14
Янгиликлар

Теннис

Уимблдон. Дунёнинг биринчи ракеткаси финалга чиқа олмади

Лондон шаҳрида давом этаётган теннис бўйича "Катта Дубулға" туркумига кирувчи Уимблдон турнирининг аёллар ўртасидаги баҳсларида финалчилар аниқланди.

Кутилмаганда дунёнинг биринчи ракеткаси Арина Соболенко 1/2 финалда WTA рейтингида 12-ўринни эгаллаб турган америкалик Аманда Анисимовага уч сет натижасига кўра имкониятни бой бериб қўйди - 4/6, 6/4, 4/6.

Асли келиб чиқиши россиялик бўлган Аманда Арина Соболенко учун ноқулай рақиб бўлиб қолмоқда. Теннисчиларнинг ўзаро учрашувларида Анисимова 6:3 ҳисобида олдинда бормоқда.

Икки соату 38 дақиқа давом этган баҳсда Соболенко 6, Анисимова 2 та эйс зарбасини амалга оширган. Қўшхатолар Амандада кўпроқ - 5 га 4. Брейклар бўйича устунлик ҳам америкалик теннисчи томонида бўлди - 4 га 3. 23 ёшли Анисимова фаолиятида илк бор "Катта Дубулға" турнири финалига чиқди. Энди у бош соврин учун польшалик Ига Свёнтекка қарши баҳс олиб боради.