Ulaanbaatar Grand Slam. Умар Бозоров япониялик дзюдочига қарши финал беллашувини ўтказди

Биз учун аҳамиятлиси, терма жамоамизнинг -90 кг вазндаги дзюдочиси Умар Бозоров мукофот жамғармаси 154 000 еврони ташкил этувчи ушбу мусобақанинг олтин медали учун япониялик Рику Окадага қарши татамига чиқди.

 Айни пайтда 25 ёшли Бозоров жаҳон рейтингида 47, 23 ёшли Окада эса 108-ўринни эгаллаб турибди. Умар шу йил Тбилиси "Катта Дубулға" турнири ғолиби бўлганди. Бу ҳамюртимизнинг учинчи, дзюдо ватани вакили учун эса биринчи Grand Slam мусобақаси эди.

Афсуски, рейтингдаги устунликка қарамай, ушбу беллашувда Бозоров дзюдо ватани вакилига имкониятни бой бериб қўйди. Ҳамюртимиз кумуш медаль билан бирга жаҳон рейтинги учун бериладиган қимматли 700 очкони ҳам қўлга киритди.