31 мар 15:43
Янгиликлар

Бокс/ММА

Усик - Фьюри бокс оқшомининг асосий карди тасдиқланди

Промоутерлар 18 май куни Саудия Арабистони пойтахти Ар-Риёд шаҳрида ўтказиладиган бокс оқшомининг асосий кардини тасдиқлашди.

Турнирнинг марказий жанги супероғир вазн тоифасида мутлақ жаҳон чемпионлиги учун бўлиб ўтади. Унда WBC чемпиони, британиялик Тайсон Фьюри (34-0-1, 24 KO) қолган учта асосий йўналиш камарлари соҳиби, украиналик Александр Усик (21-0, 14 KO)ка қарши рингга кўтарилади.

Оқшомнинг co-main event жангида латвиялик Майрис Бриедис (28-2, 20 KO) австралиялик Жай Опетайя (24-0, 19 KO) билан тўқнаш келади. Ушбу жанг ғолиби биринчи оғир (90,7 кг.гача) вазнда вакант бўлиб турган IBF чемпионлик камарини қўлга киритади.

Иккинчи ярименгил (59 кг.гача) вазнда IBF чемпиони британиялик Жо Кордина (17-0, 9 KO) ўз камарини ирландиялик Энтони Какаче (21-1, 7 KO)дан ҳимоя қилади.

Супероғир вазн кашфиётларидан бири кубалик Фрэнк Санчес (24-0, 17 KO) яна бир мағлубият нималигини билмай келаётган германиялик боксчи Агит Кабайел (24-0, 16 KO) билан муносабатларига ойдинлик киритиб олади.

Яримоғир (79,4 кг.гача) вазн тоифасида уч маротаба жаҳон чемпиони бўла олган россиялик Сергей Ковалёв (35-4-1, 29 KO) навбатдаги жангини биринчи оғир (90,7 кг.гача) вазнда ўтказади. Ушбу жангга тайёргарликни Ўзбекистонда бошлаган Ковалёв Ар-Риёддаги оқшомда швециялик Робин Сафар (16-0, 12 KO)га қарши рингга чиқади.

Ярименгил вазнда британиялик иқтидор эгаси (61,2 кг.гача) Марк Чемберлейн (15-0, 11 KO) нигериялик Жошуа Вахаб (23-1, 16 KO)ни синовдан ўтказади. Айнан шу жанг асосий кардни очиб беради.