UWW 2022 йилги халқаро мусобақалар тақвимни тасдиқлади

Унга кўра, 4-7 февраль кунлари Италия пойтахти Рим шаҳрида ўтказилиши режалаштирилган "Маттео Пелликоне" рейтинг турнири коронавируснинг "омикрон" штами сабаб бошқа муддатга кўчирилди. Энди ушбу турнир 22-25 июнь кунлари ўтказилади ва йилнинг учинчи рейтинг мусобақасига айланади. Италия ҳукумати кенг тарқалаётган "омикрон" сабаб турнирни белгиланган муддатда ўтказмасликка қарор қилган. 

Бу йилги мавсумнинг биринчи рейтинг турнири эса 24-27 февраль кунлари Туркиянинг Истанбул шаҳрида ташкил этилади. Ушбу "Яшар Догу" мусобақасида эркин ва юнон-рум кураши бўйича Ўзбекистон терма жамоалари ҳам қатнашади. 

Йилнинг иккинчи рейтинг турнири 2-5 июнь кунлари Қозоғистоннинг Алмати шаҳрида ўтказилиши режалаштирилган. Рейтинг сериясига кирувчи халқаро турнирларни 14-17 июль кунлари Тунис турнири якунлаб беради. 

Таъкидлаш жоиз, рейтинг очколарни ҳисоблаш тизимида ҳам кичик ўзгаришлар кузатилди. Баллар одатдагидек Олимпиада, жаҳон ва қитъавий чемпионатлар, рейтинг турнирларидаги иштирок учун тақдим этилади. Янги ўзгариш бўйича энди барча турнирлар эмас, аксинча курашчиларнинг йил давомида ўтказиладиган турнирлардаги энг яхши тўртта натижа очколари ҳисобланади. 

Шунингдек, энди қуръа жараёнида аввалгидек тўрт нафар эмас, рейтинги юқори саккиз курашчи турнир сеткаси етакчилари сифатида қўйилади. Йил якунида рейтинг очколари ҳисобланиб, ҳар бир вазн тоифасининг энг яхшилари эълон қилинади ва пул мукофоти тақдим этилади.