UWW Бюроси якунларида катта ўзгариш кузатилмади

Унда «Tokyo-202One» рейтинг турнирлари ҳамда Бюронинг кейинги йиғилиши қачон ўтказилиши маълум қилинди. Шу икки янгиликдан ташқари қолган масалалар бўйича қабул қилинган қарорлар ўзгаришсиз, яъни ўз кучида қолди. Аввал эълон қилинганидек, ёшлар ва катталар ўртасидаги жаҳон чемпионатига декабрь ойида Сербия пойтахти Белград шаҳри мезбонлик қилади. Бу икки нуфузли мусобақа UWW тақвимидан жой олган. Эпидемиологик вазият тақозо қилса, ҳар икки жаҳон чемпионати декабрь ойида ўтказилади.

Эслатиб ўтамиз, аввалроқ шу йил ўтказилиши режалаштирилган барча қитъа чемпионатлари, шунингдек, U-23 жаҳон чемпионати бекор қилинган эди. Бирлашган Кураш дунёси Ижроия қўмитасининг навбатдаги йиғлиши 5 октябрь куни бўлиб ўтади. Ҳафта давомида эса барча аъзо ассоциация ва федерацияларга жаҳон чемпионатига таклифнома жўнатилади. Таклиф жавобига қараб дунё мамлакатларининг ҳар икки мусобақага қизиқиши баҳоланади. 

"Насиб қилса, декабрь ойида барчамиз Белградда соғ-саломат кўришиб, ёшлар ва катталар ўртасидаги жаҳон чемпионатларини муваффақиятли тарзда ўтказамиз. Албатта, осон бўлмайди, лекин биз ташкилотчилар билан бирга рестартдаги ҳар икки мусобақани хавфсиз тарзда ўтказиш учун барча чора-тадбирларни амалга оширамиз. Ўйлайманки, эпидемиологик вазият режаларимизни ўзгартириб юбормайди", — деди UWW вице-президенти Михаил Мамиашвили.

Бундан ташқари, онлайн тарзда ўтказилган йиғилишда Олимпиада-2021 рейтинг турнирлари ҳам тасдиқланди. Рейтинг мусобақалари ҳам худди Токио Олимпиадаси сингари бир йилга кечиктирилган ҳамда улар тақдим этиладиган рейтинг очколари билан Олимпия турниридаги курашчиларнинг қуръа жойлашувига таъсир ўтказади. 

- 2019 йилги катталар ўртасидаги жаҳон чемпионати

- 2020 йилги Рим (Италия) рейтинг турнири

- 2020 йилги катталар ўртасидаги қитъа чемпионати*

- Бу йил катталар ўртасидаги Осиё чемпионатида иштирок этмаган Хитой, КХДР ва Туркманистон учун 2021 йилги катталар ўртасидаги Осиё чемпионати

- 2021 йилги катталар ўртасидаги Океания чемпионати

- 2021 йилнинг ёзида ўтказиладиган Польшадаги Циолковский (эркин кураш), Питлясинский (юнон-рим кураши) ҳамда Poland Open (аёллар кураши) халқаро турнирлари.