UWW жаҳон чемпионати бўйича қарорни яна кечиктирди

Бир муддат аввал UWW расмийлари 6 ноябрь кунига белгиланган Ижроқўм йиғилишида 12-20 декабрь кунлари Сербиянинг Белград шаҳрида ўтказилиши режалаштирилган жаҳон чемпионати бўйича якуний қарорини эълон қилинишини айтишганди.

Шу кунларда Сербиянинг Нови-Сад шаҳрида жанговор самбо бўйича жаҳон чемпионати бўлиб ўтмоқда. Мусобақа ташкилотчилари пандемия билан боғлиқ муаммоларга дуч келишмаяпти. 

Гап шундаки, UWW талаб даражасида давлатлар йиғилмаслигидан хавфсирамоқда. Ҳозирги ҳолатда Сербияга бориш бўйича кафолат берган мамлакат терма жамоалари кутилганидан камроқ. АҚШ, Япония, Куба, сўнгги жаҳон чемпионати мезбони Қозоғистон каби давлатлар жаҳон чемпионатига келмасликларини расман эълон қилиб бўлишди. 

UWW вице-президенти Михаил Мамиашвилининг айтишича, бугунги кун ҳолатига кўра, 60 дан зиёд давлатлар ўз курашчиларини Белградга юборишга розилик беришган. 

UWW Ижроқўмининг навбатдаги йиғилиши 12 ноябрь куни бўлиб ўтади. Шу куни расман жаҳон чемпионатининг ўтказиш ёки ўтказмаслик бўйича қарор эълон қилинади.