WTA 2025 йилнинг энг яхши теннисчисини эълон қилди

Ташкилот томонидан 2025 йилнинг энг яхши теннисчиси сифатида дунёнинг биринчи ракеткаси Арина Соболенко эътироф этилди. Беларуслик теннис маликаси кетма-кет иккинчи марта йилнинг энг яхши теннисчиси деб топилди

"Катта Дубулға" туркумига кирувчи турнирларнинг тўрт карра чемпиони, дунёнинг амалдаги биринчи рақамли теннисчиси Арина Соболенко "Йилнинг энг яхши теннисчиси" номинациясида WTA Player Awards мукофотига сазовор бўлди. 

Унга 2025 йилнинг энг яхши теннисчиси номи учун курашда польшалик Ига Свёнтек, америкалик Аманда Анисимова, Коко Гофф ва Мэдисон Киз, Қозоғистон вакиласи Елена Рибакина рақиблик қилди. Ғолиб халқаро теннис оммавий ахборот воситалари вакиллари томонидан аниқланган.

Маълумот учун, 2025 йилги мавсумда Соболенко US Open, Майами ва Мадриддаги WTA 1000, Брисбендаги WTA 500 тоифасига кирувчи турнирларда ғолиб бўлди. Шу билан бирга, Арина Австралия Очиқ чемпионати, Ролан Гаррос ва WTA Якуний турнирлари финалига чиқди.