Халқаро самбо федерацияси ижрочи директори Сергей Табаков ЎзДЖТСУда бўлди

Шу муносабат билан, Халқаро самбо федерациясининг мартабали меҳмонлари юртимизга етиб келишмоқда.

Бугун, 9 ноябрь куни Халқаро самбо федерацияси ижрочи директори, Россия Федерациясида хизмат кўрсатган мураббий, педагогика фанлари номзоди, Россия федерацияси жисмоний тарбия ва спот университети профессори Сергей Евгеньевич Табаков Ўзбекистон самбо ассоциацияси раиси Алишер Алимов билан бирга Ўзбекистон давлат Жисмоний тарбия ва спорт университетида бўлди. 

Меҳмонларни университет ректори Маҳмуджон Болтабоев кутиб олди. Томонлар учрашувда университетлар ўртасидаги ўзаро ҳамкорлик алоқаларини ривожлантириш ҳақида суҳбатлашишди, бир қатор мавзуларни муҳокама қилишди. Университет кафедраси мудири, доцент, Ўзбекистонда хизмат кўрсатган мураббий Шуҳрат Арсланов эса меҳмонларга ўзига хос экскурсия ташкил қилди, меҳмонларни университетнинг эътиборга молик жойлари билан таништирди ва ЎзДЖТСУга оид қизиқ фактлар, маълумотлардан бохабар қилди. Мазкур ўқув даргоҳи Сергей Табаковда илиқ таассурот қолдирди. Ўз навбатида меҳмон ушбу ташрифдан мамнун бўлганини яширмади. 

Учрашув давомида ўзбекона анъаналарга содиқ қолган ҳолда меҳмонга зарбоф чопон кийдирилди.

Ўзбекистон самбо ассоциацияси матбуот хизмати