Яна 1 та олтин ва 3 та бронза! МДҲ ўйинларидаги медалларимиз сони роппа-роса 40 тага етди + Жадвал

Бугун мусобақанинг навбатдаги кунги беллашувлари давом этаётган айни шу дақиқаларигача Ўзбекистон спорт делегациясининг умумий медаллари сони роппа-роса 40 тага етди. Бугун терма жамоамизга 15-олтин медални Муҳаммад Камолов тақдим этди. Камолов 10 метр масофада пневматик тўппончадан ўқ отиш баҳсларида умумий 236.3 балл билан энг яхши натижа қайд этди. 234.2 балл тўплаган қозоғистонлик Никита Чирюкин кумуш медални қўлга киритган бўлса, беларуслик Иван Казак 214.3 балл билан бронза медалига сазовор бўлди. 

Қолган учта бронза медали терма жамоамиз ғазнасига корэш баҳсларида полвонларимиз томонидан туҳфа этилди. Муҳаммадкарим Каримов (80 кг), Умиджон Жалолов (90 кг) ва Асадбек Зокиров (120 кг) шоҳсупанинг учинчи поғонасига кўтарилишди. 

Айни шу дақиқаларда Россия терма жамоаси медаллар жамғариш бўйича катта фарқ билан пешқадамлик қиляпти. Мезбонлар 42 та олтин, 15 та кумуш, 14 та бронза, жами 71 та медални қўлга киритиб улгуришган. Кучли учликка Қозоғистон терма жамоаси 7 та олтин, 15 та кумуш, 27 та бронза медали билан якун ясаб турибди.