Яна икки нафар сузувчимиз Токио-2020 нормативини бажарди

Бугун куннинг биринчи ярмида икки нафар вакилимиз Олимпиада нормативини бажаришга муваффақ бўлди.

100 метрга баттерфляй усулида сузиш бўйича кечган саралаш баҳслари юртдошларимиз учун омадли якунланди. Мазкур йўналишда Одилбек Юсупбаев ҳамда Элдор Усмонов Олимпиада нормативини бажарган бўлса, Ойбек Хўжаев саралаш талабига мос натижа қайд этди.

Мазкур йўналишда Олимпия нормативи 51.96 сонияни ташкил этади. Бу борада Юсупбаев 51.71 сония, Усмонов эса 51.83 сония натижа қайд этишди. 53.44 сония натижа қайд этган Ойбек Хўжаевнинг натижаси саралаш талабига мос кўрсаткич сифатида белгиланган.

Мусобақа доирасида МОҚ раиси Рустам Шоабдураҳмонов ушбу турнир орқали Токио-2020 Олимпиадаси нормативини бажарган сузувчиларимиз билан кўришди. Эслатиб ўтамиз, мусобақанинг илк кунида ҳамюртимиз Алексей Тарасенко 100 метрга эркин усулда сузиш баҳсларида Олимпиада нормативини бажариб, Токио-2020 Олимпия ўйинлари сари катта қадам ташлаган эди. МОҚ раисининг бу сафарги ташрифи аввалгиларидан фарқли равишда спортчиларимиз билан ўтказилган мулоқот билан фарқ қилди.

Рустам Шоабдураҳмонов Алексей Тарасенко ва бошқа спортчиларимиз билан суҳбатлашар экан, уларга халқаро мусобақаларда юртимиз шарафини муносиб ҳимоя қилаётгани учун ўз ташаккурларини билдириб ўтди. Шунингдек, Олимпиада нормативини бажаргани билан сузувчиларимизни табриклади. МОҚ раҳбари суҳбат давомида Токио-2020 Олимпиадасига тайёргарлик ҳукуматимиз томонидан қўллаб-қувватланаётгани, МОҚ ҳамда Туризм ва спорт вазирлиги томонидан барча шароитлар яратиб берилишини таъкидлади.

Шу тариқа Токио-2020 Олимпиадаси нормативини бажарган сузувчиларимиз сони 5 нафарга етди (Хуршид Турсунов, Владислав Мустафин, Алексей Тарасенко, Одилбек Юсупбаев, Элдор Усмонов) Таққослаш учун, Рио-2016 Олимпиадасида юртимиз шарафини 2 нафар сузувчимиз ҳимоя қилган эди.

Мусобақа бугун якунига етади. Эслатиб ўтамиз, унда Афғонистон, Туркманистон ва Ҳиндистондан келган сузувчилар ҳам баҳс олиб боришмоқда.