Янги мавсумда "Навбаҳор"ни ким бошқариши аниқ

Суперлиганинг ўтган мавсумида чемпионат ўртасида жамоадан ҳайдалган ва мавсум якунига яқин ишга қайтарилган Канчельскиснинг келаси мавсумдаги фаолияти бўйича якуний қарорга келинган.

Андрей Канчельскисни истеъфо масаласини кўриб чиққан "Навбаҳор" раҳбарияти якунда россиялик мутахассисни жамоа рулида қолдиришни маъқул топди. "Навбаҳор" билан яна 2,5 йиллик шартномаси мавжуд мураббийни истеъфоси "Навбаҳор"га 500-600 минг АҚШ долларига тушарди. 

Чунки, Канчельскиснинг "Навбаҳор" билан тузган шартномасида товон пули ҳақида алоҳида банд кўрсатилган. Шу боис ҳам "Навбаҳор" раҳбарияти янги мавсумда ҳам Канчельскисга имконият беришга қарор қилди.

Эслатиб ўтамиз, Канчельскис "Навбаҳор" рулида жами 27 учрашув ўтказди. Ўтказилган ўйинларда 7 ғалаба, 11 дуранг ва 9 мағлубият қайд этилган. Тўплар нисбати: 24-28.

Қайд этиш керакки, агарда Канчельскиснинг эҳтимолий истеъфоси руй берганида, унда "Навбаҳор"ни бошқариш учун маҳаллий мутахассислар ичидан Отабек Ғуломхўжаев ҳамда "Насаф" бош мураббийи сифатида узлуксиз 7 йилдан буён ишлаб келаётган Рўзиқул Бердиев номзоди шорт-листдан ўрин олганди.