Янник Синнер US Open чемпионлик ҳимоясига киришди

Дунёнинг биринчи ракеткаси ва шу билан бирга мусобақанинг амалдаги чемпиони Янник Синнер титул ҳимоясини муваффақиятли бошлаб олди. Италиялик теннисчи илк даврада ATP рейтингида 89-ўринни эгаллаб турган чехиялик Вит Копршивани ортиқча қийинчиликсиз мағлубиятга учратди - 6/1, 6/1, 6/2.

Бу теннисчиларнинг ўзаро ўтказган илк учрашуви бўлди. Тўқсон саккиз дақиқа давом этган баҳсда Синнер 7, Копршива 4 та эйс зарбасини амалга оширган. Брейклар бўйича мутлақ устунлик Янник томонида бўлди - 7 га 0. Энди у US Open иккинчи босқичида Алексей Попиринга қарши кортга чиқади. Австралиялик теннисчи биринчи даврада финляндиялик Эмил Руусувуорини 6/3, 6/4, 7/6(3) ҳисобида мағлуб эта олди.