Geynish va CHigiryov Jahon chempionati oldidan ISU mukofotiga davogar sifatida elon qilindi, yana bir nominaciyada O'zbekistonga oid nomlar bor!

Ahamiyatlisi, xalqaro konkichilar ittifoqi taqdim etgan nominaciyalarda O'zbekiston terma jamoasi azolari hamda sobiq vakillarimiz ham bor.

Jumladan, juftlik yo'nalishidagi sportchilarimiz — Ekaterina Geynish va Dmitriy CHigiryov "mavsumning eng yaxshi debyutantlari" nominaciyasida g'oliblik uchun davogarlar qatoridan o'rin oldi. Ulardan tashqari, bu nom uchun AQSH vakilasi Sara Everxardt hamda italiyalik Anna Pecetta kurashadi.

Joriy asr boshida terma jamoamiz sharafini himoya qilgan Tatyana Malinina va Roman Skornyakov esa "Eng yaxshi murabbiy" yo'nalishida g'oliblik uchun kurash olib boradi. Sobiq vakillarimizdan tashqari Mie Xamada hamda Maykl Xut mavsumning eng yaxshi murabbiyi sifatida elon qilinishi mumkin.

G'oliblar 30 mart kuni elon qilinadi.

Avval xabar berganimizdek, Geynish va CHigiryov juftligi 25-30 mart kunlari Amerika Qo'shma SHtatlari Massachusets shtatining Boston shahrida joylashgan TD Garden majmuasida tashkil etiladigan kattalar o'rtasidagi Jahon chempionatida qatnashadi. Hamyurtlarimizning chiqishi 26-27 mart kunlariga to'g'ri keladi.