21 авг 08:46
Янгиликлар

Теннис

19 ёшли Кори Гофф Цинциннати WTA 1000 турнири ғолибаси

Дунёнинг еттинчи ракеткаси Кори Гофф АҚШнинг Цинциннати шаҳрида якунига етган нуфузли WTA 1000 турнири бош совринини қўлга киритди.

Америкалик 19 ёшли иқтидор эгаси ҳал қилувчи финал учрашувида WTA рейтингининг 17-поғонасида бораётган чехиялик Каролина Муховани 6/3, 6/4 ҳисобларида мағлубиятга учратди. Бу теннисчиларнинг ўзаро ўтказган илк учрашуви сифатида тарихга кирди.

Уч дақиқаси кам икки соат давом этган финал баҳсида мухлислар эйс зарбасини кўришмади. Гофф 6, Мухова 5 та қўшхатога йўл қўйди. Брейклар Кори фойдасига кўпроқ бўлди - 5 га 3!

Гофф Western & Southern Open турниридаги муваффақиятли иштирокидан 900 рейтинг очкоси ҳамда 454,500 АҚШ доллари ишлаб олди. Бу Кори учун сўнгги бир ойдаги иккинчи, мавсумдаги учинчи соврин бўлди. Аввалроқ у Окленд ва Вашингтондаги турнирларда ҳам бош совринни қўлга киритганди.