07 апр 09:29
Янгиликлар

Бокс/ММА

48 ёшли жанжалкаш Бриггс қўлқопсиз жангларда иштирок этади

Супероғир вазн тоифасида собиқ жаҳон чемпиони Шеннон Бриггс (60-6-1, 53 КО) Bare Knuckle FC промоушени билан шартнома имзолади.

Хабарингиз бор, Bare Knuckle FC промоушени қўлқопсиз бокс жангларини ташкил этиб келади. Лиганинг Твиттер саҳифасида 48 ёшли Бриггснинг ташкилот билан шартнома имзолагани ҳақидаги хабар чоп этилди. Ҳозирча жанжалкашлиги билан танилган Шенноннинг янги промоушендаги дебют жанги санаси ва рақиби маълум эмас.

Маълумот учун, Шеннон Бриггс профессионал боксдаги фаолиятини 1992 йилда бошлаган. Илк шон-шарафга 1997 йилда эришган. Ўшанда у афсонавий Жорж Форманни мағлуб этишга муваффақ бўлган эди. Айнан ўша мағлубиятдан сўнг Форман фаолиятини якунлаган. Бриггс 2006 йилда Сергей Ляховични мағлубиятга учратиб, WBO чемпиони бўлганди. Фаолияти давомида у Леннокс Льюис, Виталий Кличко каби афсоналарга қарши рингга чиққан. 2016 йилда эса қўлқопларини михга илган.