Жейк Полнинг навбатдаги рақиби ва жанг санаси маълум

Бу ҳақда промоутер Эдди Хирн хабар берди. Жейк 13 август куни Томми Фьюрига қарши рингга кўтарилади.

"Жейк Пол 13 август куни Томми Фьюрига қарши жанг ўтказишини эшитдим. Пол — ғаройиб йигит. Лекин унинг бокс учун қилаётган ишлари мени ҳайратга соляпти. Мен у билан Аманда Серрано ва Кэти Тейлор жангини ташкил этишда ҳамкорлик қилгандим. Ўшанда жараён жуда қувноқ ўтган эди. Энг муҳими, у ўз устидан ишлашдан бир сонияга ҳам тўхтамайди.", — дея Хирннинг сўзларини келтирди talkSPORT.

Эслатиб ўтамиз, Жейк Пол акаси Логан Полга ҳавас қилиб, 2020 йилда бокс жангларини ўтказишни бошлаган. Ўзининг илк жангида у блогер Али Эсон Гибни нокаут эвазига мағлуб этганди. Иккинчи жангида баскетболчи Нейт Робинсондан устун келди. 2021 йилнинг 17 апрель куни Пол 36 ёшли собиқ Bellator чемпиони Бен Аскренни биринчи раундда нокаут эвазига мағлубиятга учратди. Шундан сўнг Жейк икки бор Тайрон Вудлидан устун келди. Ҳозир унинг ҳисобида профессионал боксда 5 та ғалаба (4 та нокаут) бор.