ЖЧ. Иккинчи кун ҳам муваффақиятли якунланди, кейинги босқичдаги боксчиларимиз сони ўнтага етди!

Бугунги кун доирасида уч нафар ҳамюртимиз рингга кўтарилди.

Кундузги дастурда:

1. - 63 кгда 1/32 финал жанги: Мануэль Фебус (Пуерто-Рико) - Руслан Абдуллаев, (Ҳакамларнинг якдил қарори билан).
2. - 86 кгда 1/16 финал жанги: Шоҳжаҳон Абдуллаев - Адилбек Эркин Уулу (Қирғизистон), (Ҳакамларнинг якдил қарори билан). 

Кечги дастурда:

1. - 80 кгда 1/32 финал жанги: Жасурбек Йўлдошев - Юнес Немочи (Жазоир), (Ҳакамларнинг якдил қарори билан).

Шу тариқа, ҳар уччала боксчимиз ҳам ғалаба қозониб, кейнги босқичга йўл олди. Ҳозирча ғалабали одимлаётган боксчиларимиз сони тўрттага етди.

Маълумот учун, Ойбек Жўраев, Абдумалик Халаков, Асадхўжа Мўйдинхўжаев, Аълохон Абдуллаев, Лазизбек Муллажонов ва Баҳодир Жалоловлар ўз иштирокини 1/16 финал босқичидан бошлайди.

МАТНЛИ ТРАНСЛЯЦИЯ

21:24. Жасурбек Йўлдошев жангда ҳакамларнинг якдил қарори (5:0) билан ғалаба қозониб, нимчорак финалга йўл олган тўртинчи ўзбекистонлик боксчига айланди.

21:19. Иккинчи раундд ҳам Йўлдошев яққол устунликка эришганини кўрсатмоқда ҳакамлар ҳисоби, аммо, лекин, бироқ...

21:15. Илк раунд бироз ҳавотирли кўриниш олди, назаримда. Ҳар икки боксчи ҳам тенг даражада кураш олиб борди. Ҳисоб эса фикримга қўшилмади: 5:0, Жасур фойдасига.

21:13. Жасурнинг "жасур" ҳаракатлари остида жанг бошланди.

20:55. Қарийб тўрт соатлик танаффусдан сўнг яна рингга қайтамиз. Жасурбек Йўлдошевнинг жазоирлик Юнес Немочига қарши жанги бошланишига яна 15 дақиқадан кўпроқ вақт қолмоқда.

17:00. Кундузги дастур якунига етди. Бир соатлик танаффусдан сўнг кечки дастур старт олади. Ҳамюртимиз Жасурбек Йўлдошевнинг жанги эса кечанинг сўнгида — 21:00 да бошланиши кутилмоқда.

16:15. Ажойиб! Учинчи боксчимиз ҳам кейинги босқичда!

16:10. Иккинчи раунд ҳам тугади. Шоҳжаҳон бу раундда фаолликни оширди. Ҳисобдаги устунлик ҳам сақланиб қолди.

16:06. Биринчи раунд якунланди. Шоҳжаҳон ўзига ўхшамади бу раундда. Қўлни тушуриб жанг қилиш, бироз панд бераётгандек унга. Аммо ҳисобда ҳамюртимиз олдинда.

16:03. Шоҳжаҳон Абдуллаев иштирокидаги жанг старт олди. Ҳамюртимизга омад тилаймиз!

15:35. Демак, биз яна қайтдик. Яна битта жангдан сўнг, аниқроғи 20 дақиқадан сўнг (тахминан) Шоҳжаҳон Абдуллаев иштирокидаги жанг старт олади.

14:30. Энди яна бир соат кутамиз, ўзбекистонлик боксчилар жангини. 15:40 атрофида телевизорингиз пултини UzReport'га олишни унутманг, чунки Шоҳжаҳон Абдуллаев рингга чиқади!

14:20. Гувоҳи бўлганингиздек, Руслан Абдуллаев "ўзини қийнаб ўтирмасдан", 5:0 ҳисобидаги ғалаба билан нимчорак финалга йўл олди.

14:15. Иккинчи раунд ҳам ўз поёнига етди. Руслан бу раундда ҳам устунлигини сақлаб қола олди - 5:0!

14:11. Биринчи раунд якунланди. Ҳамюртимиз яққол устунликка эришган ушбу раундда ҳакамлар бир овоздан Русланни кучли санашди (5:0).

14:06. Ва ниҳоят рингга Руслааан Абдуллаев чиқиб келмоқда! Аренадаги кам сонли мухлислар эса уни қўллаб-қувватлашдан тўхтамаяпти.

13:24. Бокс мундиалининг иккинчи кунги жанглари старт олиб улгурди. Яна иккита жангдан сўнг ҳамюртимиз Руслан Абдуллаев нимчорак финал йўлида пуэрто-риколик Мануэль Фебусга қарши рингга кўтарилади.