Абдумалик Халоков иштирокидаги жанг муддатидан олдин якунланди

Мусобақада -60 кг вазн тоифасида юртимиз шарафини ҳимоя қилаётган Абдумалик Халоков ярим финалда Япония вакили Шунсуке Китамотога қарши рингга кўтарилди. 

Жанг 2-раундда Абдумалик Халоковнинг қошидаги жароҳат сабабли тўхтатилди. Бундай вазиятда жанг тўхтатилгунга қадар олинган очколар ҳисобланади. Бу вақтга келиб Халоков жангда тўлиқ устунликка эришаётганди. Якунда ҳакамлар Абдумаликнинг 5:0 ҳисобидаги ғалабасини қайд этишди.  

Маълумот учун, Абдумалик шу кунгача Туркия, Италия ва Қозоғистон вакилларини мағлубиятга учратиб, ярим финалга қадар етиб келганди. 

Энди у финалдаги жангини Бразилия ёки Болгария вакилига қарши ўтказади. 

Абдумалик Халоков бу орқали фаолиятида кетма-кет учинчи маротаба ЖЧ финалига чиқди. Боксчимиз бунгача 2021 йили Белградда ўтказилган Жаҳон чемпионатида кумуш, 2023 йил Тошкент мезбонлик қилган мусобақада олтин медални қўлга киритганди.