ACA 131. Штирков рақибини нокаутга учратди, Абдулвахабов ва Хасбулаев камарларини ҳимоя қилишди

Оқшомнинг қизиқарли жангларидан бирида россиялик машҳур ММА устаси Иван Штирков ҳамюрти Артур Астахов билан тўқнаш келди. Яримоғир вазн тоифасида кечган жанг биринчи раунднинг сўнгги сониялари ўтиб бораётган бир паллада тўхтатилди. Штирков рақибини нокаутга учратди.

Бу Иван Штирковнинг фаолиятидаги 22-жангида қозонган 19-ғалабаси бўлди. Яна иккита жангда Иван мағлубият аламини тотиб кўрган, бир жангда дуранг қайд этилган. Артур Астахов эса фаолиятидаги саккизинчи мағлубиятини қабул қилиб олди. Жанг олдидан Иван Штирков АСА рейтингида 7, Артур Астахов эса 6-ўринни эгаллаб турганди. 

«Баскет-Холл» аренасида кечган турнирнинг марказий жангида енгил вазнда ACA чемпиони Абдул-Азиз Абдулвахабов бразилиялик Хакрэн Диасга қарши октагонга чиқди. Беш раунд тўлиқ давом этган жангда амалдаги чемпион очколар ҳисобига кўра ғалаба қозонди. Диас жанг олдидан рейтингда иккинчи поғонадан жой олганди. 

Оқшомнинг ко-мэйнивент жангида Магомедрасул Хасбулаев ярим енгил вазн тоифасидаги чемпионлик камарини илк бор ҳимоя қилди. У Рамазан Кишевни учинчи раунднинг сўнгги сониясида техник нокаутга учратди.