Adelaide International. Биринчи ракеткамиз саралашнинг финалида кортга чиқди

Унда мамлакатимизнинг биринчи ракеткаси Камилла Раҳимова ҳам ўз омадини синаб кўрди. Россиядан маҳаллийлаштирилган теннисчимиз саралашнинг 1/2 финалида 11-рақам остида таснифланган хитойлик Чжан Шуайни 7/5, 5/7, 6/4 ҳисобида мағлубиятга учратган эди.   

Афсуски, вакиламиз асосий тўрга йўлланма берган саралашнинг финал учрашувида руминиялик 35 яшар Сорана Кирстяга имкониятни бой бериб, мусобақадаги иштирокини якунлади. Бироз аввал якунига етган ва бир дақиқаси кам икки соат давом этган баҳсда тажриба ўз сўзини айтди - 7/6 (5), 6/3. 

Таққослаш учун, Камилла Раҳимова айни пайтда WTA рейтингида 91, Чжан Шуай 79, Сорана Кирстя 41-ўринни эгаллаб турибди. Соранага қарши кечган учрашувда Раҳимова 1, Кирстя 6 та эйс зарбани амалга оширди. Қўшхатолар ҳамюртимизда анчагина кўп бўлди - 7 га 2. Бу теннисчиларнинг ўзаро иккинчи учрашуви эди. Тўрт йил аввал Истанбул турниридаги илк тўқнашувда ҳам Сорана зафар қучганди. Камилла Аделаида саралашидаги иштирокидан 8 501 АҚШ доллари миқдорида мукофот пули ишлаб олди.