Алибоев гол урди ва "Сеул" ОЧЛ гуруҳ босқичига чиқди

Олдинроқ "Шанхай СИПГ" Таиланднинг "Бурирам Юнайтед" клубини таслим этиб, мусобақа гуруҳ босқичига чиққан эди.

Тошкент вақти билан 15:00да ОЧЛнинг шарқ минтақаси клублари ўртасидаги 3та учрашув бошланди. Икром Алибоев тўп тепаётган "Сеул" клуби плей-офф босқичида Малайзиянинг "Кедаҳ" жамоасини қабул қилди . Мезбонларнинг устунлиги остида кечган баҳс 4:1 ҳисобида якунига етди. Баҳсдаги сўнгги гол терма жамоамиз ярим ҳимоячиси Алибоевга тегишли бўлди. Ярим ҳимоячи жарима майдончаси ташқарисидан кучли зарба бериб, тўпни дарвозанинг узоқ бурчагига жойлаб қўйди. Шундай қилиб "Сеул" ОЧЛнинг "E" гуруҳига тушди.

"Кашим Антлерс" ўз уйида "Мельбурн Виктори"ни қабул қилди ва сенсацион мағлубиятга учради. Австралия жамоаси япон клубини меҳмонда таслим этиб, ОЧЛ гуруҳ босқичи йўлланмасини нақд қилди.

Шарқ минтақасидаги сўнгги плей-офф баҳсида "Токио" Филиппиннинг "Керес" клубини қабул қилди ва кўпчилик кутганидек ишончли ҳисобда (2:0) ғалаба қозонди.